Raso-raso Kiro-kiro

Raso lah tapacik .. diganggam ampo kironyo
Raso-raso ka singgah di tangah .. kironyo dibaok angin lalu ..
Tiok mancaliak baibo hati
Tiok tacaliak mambatin diri ..
Tiok dipaso mancaliak .. manangih tatahan tak tacaliakan lai

Ondeh mandeh ..
Musibah apo nan tajadi di badan ambo ko
Ciek nan diharok .. babuah balun
Bapupuak lah nyo rajin .. bajago nak nyo tumbuah ..
Bacaliakan pagi jo patang
Ulah dek alun tasisiah juo ..

Rasirok taruih darah di dado
Tiok mancaliak urang bapunyo
Iyo denai nak iyo juo mandeh ..
Apo kadayo .. jauah dari tangan

Usahlah mandeh barisau hati
Kok sampai disiko .. yo ka sampai juo
Tuhan Kuaso nan mamulai ..
Baliau juo nan manyudahi ..
Awak di dunie nanko hanyolah manjalani

Nyampang kok batanyo urang rami ka Mandeh kanduang
Usah diuruik tangan di dado
Usah basadiah di dalam diri
Usah piaro dalam kiro-kiro

Anak nan surang indak dapek mambari
Untuang kok anak pisang lai bakambang
Kapaninjau-ninjau mandeh dalam taragak
Ka kawan bagarah-garah ayah maso ka datang
Parintang sakik palarai damam
Buliah nak jan manakua juo di nan rami

Denai usah mandeh risaukan ..
Umua ka sampai ka ujuangnyo .. pasti ka sampai ka batehnyo ..
Denai lah rila dunie akhirat
Do'a mandeh ka kawan hiduik .. dari kini sampai ka isuak ..